إسكافي :غلاء الاحذية أنعش (الشغل) ..كلمة (نقلتي) بتزعلنا

السودانية ـ متابعات 
ما إن أطلق لسانه، حتى تخليته محامياً ضليعاً، وليس إسكافياً حاذقاً، فالرجل الذي أنفق ثلثي عمره يعالج أمراض الأحذية المزمنة والخفيفة، كثيراً ما وجد نفسه ومهنته في عين العاصفة، لكنه بصبره وحبه لعمله استطاع العبور.

وها هي الأوضاع الاقتصادية المتردية، تعيد إلى مهنة الإسكافية مرة أخرى مكانتها بين نظيراتها، فالأحذية المطروحة في الأسواق علاوة على أنها غالية الثمن، فهي غاية في الرداءة وتفاهة الصنعة.

(1)

يقول (النقلتي) (السماني): النقلتية زمان كان وضعهم كويس، لكن في السنوات الفاتت دي تدهور شوية، السوق اتملا (جزم) رخيصة، والمحلية كلما تفلس تجينا نحن المساكين ديل. واستطرد: لكن هسي بدأت الأمور تزبط شوية، يا خي الجزمة الشايفها دي، مش تعبانة ومنتهية، دي سعرها 300 جنيه، وفي جزم بـ (500)، تصور! عشان كدا الناس رجعوا تاني للنقلتية يرقعوا ويلتقوا. وأضاف: ياخي من شدة ما الناس تعبت، مرات بجيبو لينا (جزم مصوفنة ومعفنة) عديل كدا، تعرف ليه؟ لأنو جزم السوق غالية ويومين ما بتقعد.

(2)

قلت شنو؟ الأحذية بتاعت زمان؟ يا زول هوى، أحذية زمان دي موضوعها تاني، يا خي حتى السفنجات كان عندها شنة ورنة، أولاً الصينية، والفولية ودي سموها فولية لأنها خفيفة زي قشر الفول، وكمان ما تنسى القمر بوبا، السفنجات دي الواحدة كانت بقرش قرشين ما أكتر. بعدين الجيل الحالي دا ما بعرفها، يا خي ديل بعرفوا شنو؟ أسألهم عن الفريني والشلن، عشان تتأكد، إنهم ماشين ساي، ما ناقشين شيء!

(3)

بعدين بقولوا ليك نقلتية، نقلتية شنو يا خي، نحن اسمنا (إسكافية)، والنقلتي دا بتاع زمان بكون عندو سندالة بيدخل فيها الجزمة أو الشبط وطق طرق يدق فيه المسامير، أها دا النقلتي عشان نشرح ليكم تمام.
حسام احمد ـ اليوم التالي