رسالة بعيون باكية ..أمهات شهداء النيل "الكسر كبير والوجع مؤلم"

السودانية أهلنا في ولاية نهر النيل وعموم سوداننا الحبيب
كيف اصبحتو يا أهلنا وسندنا وعزنا وفخرنا ..
اهل الحارة والفزعة والجسد الواحد ..
كيف اصبحتو من هول الفجيعة ومرارة الفقد ..
كيف اصبحتو والبلاد تفقد أرواح عزيزة وعالية علينا ..
???? كيف اصبحتو وامنيات الصغار ابتلعها النيل ..
ابوي انا داير ابقي دكتور
يمة انا دايرة ابقي معلمة
ابوي انا بحب الزراعة
ابوي انا بحب الهندسة .. امنيات واحلام عريضة رسموها في دواخلهم النقية ضاعت في لحظة ..
???? أمهات التلاميذ
شهداء نهر النيل
كيف اصبحتو يا امهاتي واخواتي العزيزات في أول يوم لفقدان أعز ما تملكون
بناتكم وأولادكم الداخرنهم سند وعضد للزمن القادم ..
كيف اول يوم وسرايرهم فاضية والدار يلفها الصمت الرهيب ..
???? كيف اول يوم و كبابي الشاي مجدعة وحزينة ؟ صباح حزين بلا طعم ولا لون ولا لمة الأحباب..
حليل ناس
يمه داير لي جنيهين
حليل ناس أبوي جلابيتي الجديدة وينها ؟
يمة دايرة لي طرحة وجزمة ..
يمة كراسي إتملا ..
???? كل دموع الدنيا لن تطفئ نار الفقد الأليم وحرقة الحشا ..
???? استاذ شمس الدين مدير كبنة الأساسية والمدرسات والمدرسين
صباح حزين في حوش المدرسة ووليداتكم وبنياتكم في جوف النيل ..
عارفكم راكزين وصابرين لانو المصاب عظيم والجاي اصعب .. الوضع النفسي لي باقي التلاميذ محتاج منكم مجهود كبير وانتو قدر ذلك واكتر بإذن الله تعالي ..
???? أهلنا المناصير اعزيكم اقول شنو
كل حروف الدنيا اصغر من الفقد العظيم
كيف اعزيكم يا صناديد الرجال الحاشا
ماختولنا عيب ..
الله يجبر الكسر ؟
الكسر كبير والوجع مؤلم
الغصة تطعن في الحلق ..
وطعم الفراق في حلوقنا مُر ..
???? ياحليل نويرات الفريق بتضوي زي نور الأمل
ياحليل حنين الأمهات مشتاقة لي ولداً رحل
لمتين يعود يملأ الفريق بي الفرحة زي ملكاً نزل
يمسح دموع سالت كتير ويعدل العوج الحصل ..
لا حول ولا قوة إلا بالله العلي العظيم
انا لله وانا اليه راجعون
#غرق_تلاميذ_المناصير
✏ ابراهيم علي ساعد
بارا .. شمال كردفان
الخميس 16 أغسطس 2018م
فيس بوك