تعدد الأزواج (ما بيدي)!..أهلي (ضربوني) عشان الغنا.. واتعلمت الرقيص في (المراية)!

الخرطوم ـ السودانية تلقب بفنانة الاستعراض الأولى في السودان.. جاء ظهورها متزامنا مع ظروف عصيبة كانت لا تستطيع من خلاله المرأة اعتلاء المسارح ليصدح صوتها بالغناء ناهيك عن أن يتمايل جسدها بالرقص وسط صيحات المعجبين وعلو أصوات الرافضين. إلى جانب ظروف عصيبة أخرى، تمثلت في قبضة الحزب الحاكم آنذاك فيما يتعلق بالفنون، ذلك الأمر الذي ربما ضاعف معاناتها كثيراً.. تحب الفن والغناء منذ نعومة أظفارها، وهي تستمع لعمالقة الفنانين وتلاحق حفلاتهم في الخفاء، عانت كثيراً من أسرتها المتشددة التي كانت تحاصرها بشدة لكي لا تصبح فنانة، إلا أنها ورغم ذلك استطاعت أن تغني وأن تفرض اسمها الفني على المشهد.. ينادونها بـ(كبيرة الفنانات) أو (الزعيمة)، لكن يبقى اسمها الأبرز هو حنان بلوبلو، والتي التقتها (فلاشات) في حوار خاص للغاية.. فماذا قالت؟
*حنان بلوبلو اسم وصوت غنائي تمدد في الساحة الغنائية قبل سنوات طويلة.. من تذكرين من دفعتك آنذاك؟
ما كانوا كتار ومنهم الفنانة بهاء عبد الكريم وعوضية عز الدين وفاتن عبد الحفيظ وأخريات.
*في أي عام كانت البداية الحقيقية التي اشتهرتِ من خلالها كفنانة؟
البداية الحقيقية كانت في العام 1986 وقبلها كنت بغني في بيوت المناسبات وكان ذلك في حي الهاشماب بأمدرمان وبعدها بقيت أشارك في برامج الأطفال بالتلفزيون، واشتهرت عبر أغنية (حمادة ده) وكان أول كاسيت لي ظهر في تلك الفترة.
*ما هو موقف أسرتك تجاه المجال الذي اخترتِه؟
أسرتي كانت رافضة الموضوع جملة وتفصيلاً لدرجة أمي كان (بتضربني) والمشاكل طوالي مدورة بينا.
*ليس لأسرتك علاقة بالغناء.. من الذي حببك فيه؟
الفنان الراحل زيدان إبراهيم والفنانة سمية حسن.. ديل الحببوني الغنا، وكنت بتمنى أبقى زيهم وكنت بلاحق حفلاتهم.
*طيب.. كيف اقتنعت أسرتك بأن تصبحي فنانة؟
لما كنت بمشي برنامج الأطفال جمعتني معرفة بالأستاذ بشير جابر، وحكيت ليه رفض أسرتي للغناء، قال لي ما في حل غير الزواج، وفعلا اتزوجت بشير جابر ووقف معاي وشجعني في الغنا وأنجبت منو أولادي (معزة ومحمد ومعتز) وبعدها انفصلنا وتوفي قبل سنوات قليلة.!
*تميزت عن سائر المطربات بالرقص الاستعراضي.. أين تعلمت الرقص؟
ضحكت ثم قالت: (اتعلمت الرقيص في المرايا).. وتواصل: (أي رقصة بتعجبني كنت بقوم وأقلّدا قدام المرايا لحدي ما بقيت محترفة والظهرو بعدي قلدوني).!
*الم تتخوفي من ردة فعل الشارع السوداني باعتباره فنا جديدا لم يعتادوا عليه؟
يعني واجهتني صعوبات كتيرة وفي جهات سعت لمحاربتي، لكني لم أيأس لأنو في ناس بيحبوا الاستعراض وواصلت فيهو ونجحت.
*من خلال مهنتك تجولتِ في مدن وولايات ودول كثيرة.. كيف كان يتم ذلك؟
فعلاً أنا لفيت السودان ده كلو وسافرت دول خارجية كتيرة ما ليها حد، وبتذكر في الرحلات الداخلية كنا بنسافر بي (بص العيلفون) وكان بيجيبو لينا شلضم متعهد الحفلات وبتستمر الرحلات أيام وكان الدنيا بي خيرا.!
*حدثينا عن أول لقاء جمعك بالفنان الراحل محمود عبد العزيز؟
التقيت بالفنان محمود عبد العزيز في برنامج الأطفال.
*كيف تم زواجك منه.. وهل عشت معه قصة حب؟
كنت وقتها مريضة، وكان عيد ميلادي، فجاء لزيارتي المخرج شكر الله خلف الله والأستاذ عبد الباقي خالد عبيد ومعاهم محمود عبد العزيز، وكان في الغرفة صورة جمعتني بي محمود عبد العزيز في ألبوم (جواب للبلد) فعلق شكر الله وعبد الباقي قائلين: (عاملين كده ذي نوال الزغبي ووائل كافوري)!.. فالظاهر محمود الفكرة عجبتو وفي نفس اليوم اتصل علي قال لي (يا حنان إنتي متزوجة)؟.. قلت ليه (لا).. قال لي (داير أتزوجك)، وفعلاً وافقت واتزوجنا خلال عشرة أيام فقط.!
*هل كان هناك توافق بينكما.. خصوصاً وأنتِ أكبر سناً من محمود بما يقارب العشر سنوات؟
ردت بدهشة: (منو القال كده.. أنا ومحمود عبد العزيز مواليد 1967 يعني قدر بعض).!!
*كيف ذلك وأنتِ تغنيتِ للرئيس الراحل نميري؟
أنا ماغنيت لي نميري لأنو الوقت داك ما احترفت الغنا.. والغنت لي نميري هي الفنانة حنان أحمد.. عشان كده الناس بتخلط بيني وبينها.!
*حنان بصراحة.. هل أحببتِ محمود من أجل شخصيته أم من أجل فنه؟
شوفي.. أنا قبل ما أتزوج محمود كنت معجبة بي غناهو بصورة غير عادية، وأي شريط ليهو موجود عندي من أول ألبوم لحدِّي آخر ألبوم، وفي الغربة ما بسمع لي فنان غيرو إلا ود الأمين، ولما اتزوجتو حبيتو وحتى لما اختلفنا واتفارقنا برضو هو فناني الأول المعجبة بيهو، وأكن له كل احترام وتقدير له الرحمة.
*كم من الزمن استمر زواجك بمحمود عبد العزيز؟
3 سنوات وبعدها انفصلنا.
*هل فرقت بينكما الغيرة أم أسباب أخرى؟
على الرغم من إنو محمود كان فنان، لكن كان بيغير علي شديد، وبعد مرات بيرسل زول يسافر معاي عديل إذا كنت شغالة في أي ولاية أو غيرها، وما أكذب عليك الغيرة كانت سبب أساسي في الانفصال.
*أنتِ متعددة الزيجات.. بعد انفصالك من بشير جابر ومحمود.. هل تزوجتِ مرة أخرى؟
طبعا التعدد دا ما (بيدي أنا).. ممكن نقول القسمة.. وبعد انفصالي من محمود اتزوجت رجل آخر لكن ليس له أي علاقة بالوسط الفني.
*إذا سنحت لك فرصة للزواج مرة أخرى.. هل ستوافقين؟
كل شيء مسطر ومقدر من المولى عز وجل.
*حنان.. كيف هي علاقتك بزملائك في الوسط الفني؟
ظروف الحياة المختلفة خلتنا ما نتلاقى زي زمان.
*هل هي ذات الظروف التي جعلتك تختفين من الساحة مؤخراً؟
أنا حالياً مشغولة بأحوالي الخاصة وترتيبها.
*بمناسبة أحوالك الخاصة.. أنتِ مررت في الفترة الماضية بأزمة مالية حادة جعلتك تقومين بعرض منزلك للبيع.. هل ساهم ذلك الظرف في انفضاض الناس والأصدقاء من حولك؟
التجربة التي عشتها جعلتني أتعرف على (العدو) من الصديق، وانكشفت لي نوايا الناس وعلى الرغم من دا ما بلوم زول.. والناس ظروف.!
*كيف استطعتِ الخروج من تلك الأزمة المالية الكبيرة؟
(حليت نفسي بي نفسي).. بعت بيتي القديم واشتريت آخر، والحمد لله كل أموري ماشة تمام.
*يقال إن من اشترى منزلك لاعب كرة قدم شهير.. هل هذا صحيح؟
أي صاح.. اشتراهو لاعب الهلال مدثر كاريكا.
*بصراحة يا حنان.. أنتِ مشهورة بفعل أعمال الخير واستضافة الناس بمنزلك وإكرامهم، هل ستجعلك هذه الأزمة تعيدين النظر في تعاملاتك؟
والله عمل الخير ده لي الله.. وما بقيف منو نهائي وهو (النجاني وغطاني).. وأنا موجودة مع الأصحاب والأحباب، لكن في الفترة الأخيرة انشغلت منهم عشان تشطيبات البيت الجديد.!
*كيف تتعاملين مع الحسد؟
صاحب مهنتك (عدوك).. والظروف الليلة اختلفت من زمان، نحن في فترة جالسنا نجوم الفن أمثال الراحلين صديق الكحلاوي وبادي وأحمد المصطفي، وكانت المعاملة بينا جميلة وهم أقدم مننا ورغماً عن ذلك ما كان في غيرة وكانوا بيتباروا في تقديم الأغنيات الجديدة، يعني الليلة الكحلاوي قدم أغنية جديدة بكرة بادي بيقدم أغنية أجمل منها والقبول من الله.!
*يتردد أنك تجاملين ابنك محمد كثيراً فيما يتعلق بالفن.. ما هو رأيك؟
محمد له صوت من الخامات الجميلة، وبشهادة فنانين كبار، وأنا مابجاملو.. أنا بنصحو بس يشوف الغناء الجميل ويقدمو، وخصوصا بعد أن أكمل دراسته الجامعية، وبتمنى ربنا يوفقو لأنو درب الفن صعب داير صبر وطولة بال.
*طقوس تقومين بها قبل طلوع المسرح للغناء؟
طبعا بتحصن ودائما بنطق الشهادة لو مارقة أو عند النوم، وبقرا صور قرآنية معينة تكفيني شر العين والحسد.
*أخيراً.. هل لا زال صوت بلوبلو يحتفظ بذات الألق القديم؟
إذا ما بقيت بذات الألق لتركت الغناء قبل أن يطلب الجمهور مني ذلك... لأنو هو الحكم... ولو فقد صوتي البريق لما كنت حتى هذه اللحظة مطلوبة في الحفلات المختلفة.
محاسن احمد عبد الله ـ السوداني