ما فكرت في رئاسة الهلال ولا المريخ لأنو ناس الرياضة (شتامين) وصعبين

الخرطوم ـ السودانية قال رجل المال والاعمال بابكر حامد ود الجبل ،ان زمن الثراء وجمع المال قد ولي ،واضاف في حديث لأولي حلقات البرنامج الجديد (صباح الشروق) بقناة الشروق ،(الظروف بقت صعبة ..ما زي زمان ..نحن ذاتنا تجارتنا بقت تخسر ) ،واضاف : (انا ما عندي مانع اقيف مع الشباب وادعمهم ..لكن ما يجيني زول من طرف عشان ما يغشنا ..مرات الواحد يقول ليك عايز لي 5 آلاف دولار عشان امشي اوروبا ،زي ده انا ما بديه ..انا بساعد المساكين والفقراء بس) وفي سؤال عن عدم تفكيره في رئاسة اي ناد رياضي ،قال ود الجبل : (انا احسن لي ادعم المساكين ..انا كده مرتاح ..ما فكرت اكون رئيس لي اي ناد لأنو ناس الرياضة ديل شتامين وصعبين ..هسع شوف بيشتموا جمال الوالي كيف ) ،واضاف انه يميل للهلال ويدعمه وكذلك المريخ لأنه قومي التوجه .
وعن سر النجاح قال ود الجبل لابد من الصدق والامانة في اي عمل والتوفيق من ربنا ،وعن المواقف التي مر بها ،قال انه حين شاهد عمارة فاروق في الخرطوم 2 لم يحسده (لكن كنت بغران ..الحسد ما كويس ..قلت لازم ابني عماره زيها واحسن ،وفعلاً بنيت عمارة في نفس الشارع وزائده عنو بي طابق كمان ،حتي في ناس قالوا ود الجبل بني العمارة دي عشان يشوف الجبل من هنا (ضاحكاً ) وده طبعاً كلام ما صاح .