الفاتح جبرة يكتب : حي يرزق

السودانية عندما وقعت وزارة المعادن السودانية ذلك العقد الملياردولاري مع شركة “سيبيريا للتعدين” الروسية في يوم الأربعاء 29 يوليو 2015 وأعلن وزير المعادن السوداني أحمد محمد صادق الكاروري حينها خلال مراسم توقيع العقد في القصر الجمهوري، أن “سيبيريا للتعدين” اكتشفت أكبر احتياطات من الذهب الخام في السودان في ولايتي البحر الأحمر ونهر النيل ولم يكتف (الوزير) بذلك فقد صرح بعد توقيع العقد بأن الشركة المذكورة قد قامت بالتنقيب عن الذهب في موقعين بولايتي البحر الأحمر ونهر النيل بمعدات حديثة استطاعت بها تحديد كميات بلغت 46 ألف طن من الذهب تمثل كنزا في باطن الأرض مضيفاً أن القيمة السوقية لهذه الكميات من الذهب تقدر بنحو 298 مليار دولار .

عندما وقعت الوزارة ذلك العقد وسمع العبدلله وشاهد تصريحات الوزير بدأ في التجهيز لما بعد الطفرة وأي طفرة
– دي شنو يا راجل الجلاليب الما عندها ياقات دي ؟ بقيت ختمي وللا شنو؟
– إنتي من زمن ختمي وأنصاري؟ .. دي جلاليب الطفرة !
ولما رأيت علامات الإندهاش على عينيها أوضحت لها الأمر لكنها إبتسمت وقالت لي :
– بالله إنتا بتصدق كلام ذي ده؟
ما بصدق ليه؟ إنتي قايلا الحكومة دي حكومة كضابين؟ ديل ناس (هي لله) يعني الكلام البيقولوهو لا فيهو شق لا طق ..
– أها عايزة العربية ياتو ماركة وياتو موديل؟ شفروليه كابريس وللا مارسيديس وللا كاديلاك و ….
– والله إنتا ما براك ؟ أنحنا ركوب الركشات والخافلات جاب لينا قطايع وفلايت تقول ليا كاديلاك وشنو ما بعرف
– إنتي بس إختاري الموديل وإتخيليها كده في القراش بتاع الفيلا؟
– (معاها ضحكة) : كمان جابت ليها فلل ؟
– ده كلامك .. وكمان فيها (حوض سباحة)
– والله إنتا الليلة ما براك .. يا أستاذ شوف ليك كيسين أسمنت للسقف ده الخريف قرب
– (الطفرة) ذاااتا قربت .. الوزير قال ستة شهور بس … قولي سنة .. السنة دي بتجري جري بكرة نقبض نصيبنا والترطيب يحصل
– (في تهكم) : تقبض شنووو؟ هو إنتا قبضتا من الحكومة دي شنو قبل كده
– آآي البترول ما شفنا ليهو حاجه وقروشو محل مشت ما إتعرفت لكن الدهب ده كلامو تاني
– يعني شنو ؟ ح توزعو ليكم الأمم المتحدة ؟
– بي مناسبة الأمم المتحدة دي عايزة أجيب ليك الشغالة من ياتو دولة؟ ممكن الفلبيين ممكن أندونيسيا ممكن تايلاند .. بنغالية .. إنتي بس إختاري الجنسية وخلى الباقي عليا !
– والله (الجماعة) ديل ح يجننوك .. إنتا بتصدقهم؟
– ما أصدقهم ليه؟ الوزير ذات نفسو قال لو الكلام ده طلع ما صاح الرئيس اليعدمني في ميدان عام !

كسرة :
كان ذلك في العام 2015 .. والآن نحن في منتصف 2017 تقريبا .. جلاليب (الطفرة) التي
قمت بتفصيلها (ضاقت) .. لا زالت (ام الأولاد) تذكرني بالعربية الكاديلاك والفيلا (أم حوض سباحة) والشغالة (الفلبينية) وقضاء العطلة في جزر الكاريبي .. والمشكلة أن وزير المعادن لا زال حي يرزق !
• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+وووووووووووو)+ (وووووووووووو)+(وووووووووووو)+(وووووووووووو)+ (وووووووووووو)+(وووووووووووو) +و+و+و+و+و+و+و
• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+و+و+(و)+و+(و)+و+و+و+و+و+و+و+و
• كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنو (وووو)+(وووو) +و+و+و+و+و+و