• ×

الراحل (أبوآمنه حامد) الشاعر الذي (سال من عمره التعب)

زيادة حجم الخط مسح إنقاص حجم الخط
الخرطوم/السودانية/ الراحل (أبوآمنه حامد)
الشاعر الذي
(سال من عمره التعب)
أو
كما وصفه (وجدي الكردي)
في هذا الحوار...!!

في بيت مثل كهف تتدلى منه خيوط الفقر...
باض فيه حمام البؤس وأفرخ...
وجدته نصف مستلقٍ على سرير عالٍ
حتى ان إحدى قدميه تخلصت من
فردة السفنجة لأنها لا تكاد تلامس الأرض...
أمامه صحن من (محلول الفول) كان يغمس
فيه رقائق من رغيف الصبر...
لم أتبينه أو أنه إنتهى من تناوله أو ربما لم
يجده من الأصل ف طفق الصحن
يفغر فاهه الضيق ينظر لصاحبه الذي تلهى
عنه بدخولي عليه....


شاعر وساخر فقير...
وحين يجتمع الفقر والسخرية...
كلاهما يعزى الآخر...
لحظت حرصه على ألاّ يذكر تاريخا بعينه...
وكنت أعلم في قرارة نفسي أن ذاكرته
الواهنة لا تقوى على ذلك لكنه برر زوغانه قائلاً:

شوف...
الشعراء والمؤدباتية زي حالتنا كدا ما بيذكروا تواريخ عشان ما تقدر تعرف عمر الواحد فيهم كم..!!

أبو آمنة يبدو ستينياً ضامراً عصرته أصابع
الفقر الغليظة الذي ترك توقيعه
بخط « شين» على وجهه...
وفمه الواسع يبتسم ساخراً من فعلته...
إجاباته أقصر من قبلة مودع يكاد قطار بورتسودان
أن يفوته...

ما لا نعرفه عن «ابو آمنة حامد»؟؟
ــ كنت راعيا لغنم الحلة في هيا...
والآن أرعى غنم إبليس في الخرطوم...
ولهذا لم اصلح ضابطاً في الشرطة ولا قنصلا إعلامياً ولا إنساناً يصلح للقرن الحادي والعشرين....

* ماذا حملته من هيا ولم تفارقه حتى الآن؟!
ــ كل شئ...
وينتابني الإحساس ب الغربة في شوارع الخرطوم...
واتمنى امتلاك مراح من الضأن ارعاه في إستاد الخرطوم....

* ماذا بقى لك من كلية الشرطة؟
ــ تخرجت فيها برتبة ملازم...
ومن دفعتي الفريق عثمان الشفيع
وعباس ابو شامة...
ومدربي كان هو السر الباتيرا...!!

* هل كان معك أبّارو؟
- يا راجل (ابّارو) شنو...
قول كمان معاي عثمان دقنة..!

* لماذا لم تستمر في الشرطة؟
ــ والله قدمت استقالتي...
ما نافعة معاي...

* طيب جيت من هيا ليه أصلاً؟
- جابتني شقاوتي...
لا قعدت مع الهدندوة بقيت سعيد..
لا لقيت « سعية» في الخرطوم....

* لماذا توقف ابو آمنة عن كتابة الشعر؟
ــ اكتب لي منو؟

* للجمال والوطن والمبادئ؟
ــ يا سلام عليك...
انت الظاهر رسلوك من السما الليلة...

*ليه؟
ــ انا لا ارى في الوجود شيئا جميلا ...
غير المرتب والمصاريف...
حتى دا ما لاقيهو عشان اكتب فيهو شعر...

* واين المبادئ؟
ــ ياخي خليك من الرومانسيات دي...

* وماذا يفعل ابو آمنة الآن؟!
ــ زي ما شايف...
اتأمل فنجاني المقلوب...

* طيب ماتشتغل؟
ــ اشتغل شنو...
انا كنت مدرس في بربر الثانوية سنتين..
ومن تلاميذي البروفسير احمد علي قنيف...
ياخي ناس بربر ديل اجمل ناس، شكلاً ومضموناً..!

* من هم الذين غنوا لابي آمنة؟
ــ وردي غنى بنحب من بلدنا وقالوا بتحب...

* وانت لسع بتحب من بلدك؟
ــ والله اعفيني من السؤال دا...

* ليه؟
ــ لاسباب قد تجعلني معتقلاً...!!

* من السلطات الرسمية؟
ــ لا.. من السلطات المنزلية..!!

* واين التي سال من شعرها الذهب؟
ــ في ملكوت الله...
الله يرحمها كان عندها (صوت وصورة)...
مش زي (البيشخشخو) حسع..!!

* متى تعرفت على الحب؟
ــ تعرف انا اول مرة اعرف انو الحب غير منطقي وعميان وعبيط كمان .. كان في القاهرة..
عندي واحد صاحبي حسع من اشهر الشعراء العرب...
36 ساعة في اليوم يكتب شعر في زوجتو...
تعرف يوم مشيت معاهو البيت لقيت زولة شينة خلاص...
قال دي مرتو...
حكمة ربنا..!!

* يعني انت ما بتحب الشينين؟!
ــ يا اخي اقطع قلبي ليه معاهم...

* اغنياتك يا ابو آمنة هل قبضت ثمنها؟.
ــ والله ما قصروا معاي...
محمد الامين عندو جانا الخبر شايلو النسيم...
وسيد خليفة عندو جاري وانا جارو...
الله يرحمو...
خلانا نتعذب بي نارو!!

* نار منو؟
ــ نارالفلس طبعاً...

* وتاني؟
ــ ما نسيناك للجابري....
والفنانة المصرية فايزة احمد قربت تغني لي اغنية... لكنها ما صبرت... ماتت!

* رأيك في تعدد الزوجات؟
والله المرا اذا شدت حيلا ما في داعي...
واذا الراجل مقتدر وحيعدل يتوكل طوالي...

* يعني انت سعيد؟
ــ ابداً.. مفلس بس..!!

* كم رصيدك في البنك الآن؟
ــ بنك!!!
والله بنك الدم ذاتو ما يلقى فينا قزازة...
انا اسمي ابو آمنة ما ابو العلا...

* هل كان بامكانك ان تكون ثريا؟
ــ شوف...
انا احساسي ب الحياة لم يكن عن طريق الثراء...
لذا لم اناضل لجمع المال...

* ألست نادماً الآن؟
ــ ابدا...
((نفسي التي قد تملك الاشياء ذاهبة..
فكيف ابكي على شئ اذا ذهبا؟))...

* لماذا ترك ابوآمنة رياضة المشي؟
ــ يا بوي الشعب السوداني كلو ماشي...
تصدق اطلع الشارع القى الدنيا كلها ماشة...

* شخص فقدته..؟
ــ الفنان ابو داؤود...
كان صديقي وجاري...
ومفلس زي حالتنا كدا...

* هل تفتقد في حياتك شيئاً؟
ــ ايوه افتقد ان اكون وزيراً...

* وزير شنو؟
ــ وزير اعلام...

* ليه ما تبقى وزير مالية؟
ما بعرف حساب...
لو مسكت الوزارة دي بعد يوم واحد البلد كلها تفلس..!!

* ابو آمنة رئيس جمهورية اول قرار؟
ــ كنت حاقدم استقالتي طوالي...

* ليه ؟
يا خي دا شعب صعب...
يحلم وهو صاحي...

* صحفي سوداني؟
ــ حسن ساتي...

* وحسين خوجلي؟
ــ رجل فنان...
أحبه ولا احبه...

*كيف ؟
ــ اختلف معه واحترمه...

* اسحق احمد فضل الله؟
ــ جبهجي...
مرتاح في الدنيا وداير يرتاح في الآخرة..!!

* السودان ناقص الانقاذ يساوي ؟
ــ يساوي جبانة هايصة...

* الحب ناقص المال يساوي؟
ــ يساوي حُمى ورمتلة ساكت...

* القصيدة ناقص الفكرة تساوي؟
ــ تساوي اسهال حروفي مزمن...

* هل تخاف من الغد؟
- الهدندوة علموني الآّ اخاف إلا من رب العالمين...

* لماذا تبدو حزينا؟
- ومن قال لك ذلك...
ياخي شكلي كدا...

* آخر مرة بكى فيها ابو آمنة؟
عند وفاة والدتي...
أنا بقيت يتيم حسع..!!

* بماذا تحلم؟
احلم بمجاورة أمير المؤمنين الذي يدفع لي خمسين الف دينار من (حقات زمان)
وجارية وغلاماً ..!
و......

رحم الله شاعرنا الفذ أبو آمنة حامد
|||||||||||||||


بواسطة : admin
 0  0  90
التعليقات ( 0 )

جميع الأوقات بتوقيت جرينتش +4 ساعات. الوقت الآن هو 06:04 مساءً الأحد 22 مايو 2022.