محمد الطيب يكتب عندما يكون الإسكيرت (أرجل) من العِباية .

الخرطوم/السودانية/ محمد الطيب يكتب عندما يكون الإسكيرت (أرجل) من العِباية .
كل الدول المُحترمة في العالم (تُخفض أسعار السلع) عند قدوم شهر رمضان.
وفي السودان حتى (سم الفأر) سعرو بزيد بمناسبة رمضان.
في بلدي لو علموا (تاريخ القيامة) لزادوا سعر (المُصلاية).
كسرة :
قالت لي : أنا في رمضان بلبس عبايات بس.
ولما قابلتها صدفة رابع يوم في رمضان لقيت العباية (مُفصلة ومُقسمة) فقلت لها متسائلاً : وبعد رمضان بتلبسي شنو !!!؟؟؟
مرات (الاسكيرت) بيكون أرجل من العباية.
كسرة ونص :
كثير من الرجال بحاجة إلى معرفة أن (ضيق الأخلاق) ليس من (لوازم الصوم).
يعني ممكن تكون صائم وما زهجان .. عادي والله يا جماعة .
كسرة ونص وخمسة :
احتقرت نفسي كثيراً عندما شاهدت إمرأة في عمر أمي تحسب بنور الربيكا (الكشاف) تحسب عائد دخلها من (السابعة صباحاً وحتى الثامنة مساء) .
وقد كان العائد 1780 جنيه.
هذا المرأة تفترش (البهارات) أمام (فرن) حلتنا.
حسبت القروش ووزعتها على تلاتة كيمان ثم قالت الحمدلله من الأعماق.
علمت لاحقاً أن (ربع) عائد محصلتها اليومية يذهب لشراء الأنسولين وحبوب الضغط.
أين نحن من (الحمدلله) هذه ؟
أين نحن من هذا القلوب السليمة الراضية والمرضية؟
كسرتين إلا ربع :
اسأل الله أن تتحقق امنيتي هذه العام واشرب عصير (القمر دين) للدنيا والزمان.
كسرتين :
عندنا نحن في السودان ثقافة الونسة بالأكل.
يقول ليك : فطرنا بدمعة فراخ واتعشينا بي كفتة واتسحرنا بي كنافة.
الاكلتو أنت لو ونستنا بيهو ما ح نشبع ولذلك حتى لا تكون (أهبل) ما تونسنا بالحاجات الفي بطنك.
كسرتين :
قبل رمضان قالت لي أنا بالنهار بقفل تلفوني ، وبعد الفطور لا بجر يد ولا بجر رجل وبعد التراويح بنوم وما بصحى إلا للعشاء.
الغريب في الأمر تلفونها مشغولة في كل هذه الأوقات التي ذكرتها.
مسكينة شكلها خاتاني للعيد.
و.....
ويا أستاذة : مفروض بعد تغسلي عِدتكم تغسلي عِدة الجيران كمان.
رمضان كريم عليكم الأحباب وتصوموا وتفطروا على خير ويارب يعود وبلدنا قدام.
تحياتي .. محمد الطيب الأمين