الفاتح جبرا يكتب أقوالهم

السودانية/ الخرطوم/ ليس هنالك حكومة في العالم (تشتم شعبها) وتكيل له الإساءات ثم تتحداه أن ينازلها لتهزمة شر هزيمة وتفتك به غير أولئك القوم الذين علموا الآن أن هذا الشعب (شعب معلم) ليس من شيمته الخنوع للذل والهوان وإن طال وقت الإنعتاق ، هذه أقوال عابرة تفوه بها القوم لحظات زهو وإفتتان بالقوة والسلطة نبذلها للتدبر والتفكر علهم يقتنعون بأن الملك لله !
المخلوع :
المقولة : (الذين قتلوا في دارفورلا يزيد عن 10000 عشرة ألاف فقط)
المناسبة : مؤتمر صحفي عالمي له عبر شبكة الفيديو كونفرنس بالأقمار الإصطناعية في 5 نوفمبر 2006
المقولة : (ديل شذاذ آفاق،، والمحرش ما بكاتل، ووالله ممكن نجيب المجاهدين بتاعنا عشان يتعاملوا معاهم،، لكن نحن حكومة مسئولة وعشان كدا خلينا سلطات الحكومة تتعامل معهم)
المناسبة : متحدثاً عن مظاهرات يونيو 2012 بخصوص رفع الدعم
مصطفى عثمان إسماعيل :
• المقولة : البيمد يدو للمؤتمر الوطنى بنقطعها ليهو..!!
• المناسبة : تظاهرات رفع الدعم 2012
• المقولة : (قبل الإنقاذ كنتو شحاتين)
• المناسبة :صحيفة الشرق الأوسط عند لقائه بسودانيين فى الرياض، غير أنّه أنكر ذلك، لكن الصحيفة نشرت نص تلك المخاطبة على اليوتيوب فى موقعها بالإنترنت.
المقولة : (الما داير يدينا صوته ما يمشي في زلطنا، وما يولع كهربتنا، وما يشرب مويتنا)
المناسبة : في الشمالية خلال فترة آخر إنتخابات أجرتها الإنقاذ.
المقولة : (من الصعوبة ارجاع المواطنين الى مرحلة ما قبل استخراج البترول..الشعب السوداني تعود على الرخاء ويصعب عليه الفطام منه).
المناسبة : المظاهرات التي إندلعت ضد رفع الدعم، سبتمبر 2013
المقولة : (عدد الذين ماتوا في دارفور لا يزيدون عن 5000 (خمسة آلاف قتيل) ]….!!!! المناسبة : تصريح أمام مؤتمر صحفي عقده في القاهرة فى 26 مايو 2007
علي محمود عبدالرسول (وزير مالية) :
المقولة : (بعد دة إرجعوا للعواسة)
المناسبة :بعد إنفصال الجنوب وتوقع إنهيار الإقتصاد السوداني.
المقولة : (قبل الإنقاذ كانت البيوت شينة، وما بتعرفوا أكل البيتزا)
المناسبة : المظاهرات التي إندلعت ضد رفع الدعم، سبتمبر.
الحاج آدم يوسف (أب ساطور) :
المقولة : (إن الفرد قبل الإنقاذ لم يكن باستطاعته أن يمتلك قميصين، الآن كل الدواليب مليااانه)
المناسبة : يتحدث عن فضل الإنقاذ على الشعب السوداني.
نافع علي نافع :
المقولة : الدايرين يقلعوا النظام أسهل ليهم لحس الكوع.
المناسبة : جمعة لحس الكوع 29 يونيو 2012
المقولة : (يهزوا ضراعهم الدايرها يجي يشيلها بي القوة).
المناسبة : يتحدث عن المعارضة.
أحمد هارون :
المقولة : (أمسح، أكسح، قشو، ما تجيبو حي، ما عندنا ليهو مكان، ما عايزين أعباء إدارية)
المناسبة : في كادقلى يتحدث ضد الجبهة الثوريّة .
المقولة : (أنام ملء جفوني عن شواردها …. ويسهر الخلق جرّاها ويختصم)
المناسبة : في مقابلة مع جريدة الشرق الأوسط عن إتهامات المحكمة الجنائية الدوليّة، قال إنّه لا يهتم بها وأنشد هذا البيت.
عبدالرحمن الخضر :
المقولة : (الما عاجبو سياساتنا في الخرطوم يمشي يلقى ليهو بلد آخر يسكن فيهو).
المناسبة :متحدثاً عن تضجر سكان العاصمة من تراكم الأوساخ.
المقولة : الزارعنا غير الله يجي يقلعنا.
المناسبة : إحدى اللقاءات الجماهيرية.
صلاح قوش :
المقولة : (كل من يحاول إدخال يديه لانفاذ مخططاته المحكمة الجنائية الدولية سنقطع يده ورأسه وأوصاله لأنها قضية لا مساومة فيها).
المناسبة : متحدثاً بعد توجيه إتهامات المحكمة الجنائية الدولية ضد البشير
المقولة : (الشعبي عواليق، والحركة الشعبية عواليق، والمعاهم يطلع بره).
المناسبة : مخاطباً جمعاً من أبناء دائرته إبان الانتخابات الأخيرة.
وتنشيطاً لذاكرتك عزيزي القارئ وضعنا لك هذه الأقوال التي قيلت في مناسبات مختلفة :
• مأمون حميدة : الما عندو قروش داير يقرأ لي شنو..؟
• حسن طرحة : أكياس شنو استعملو خرتايات.
• ياسر يوسف أبكر : مقاطعوا الانتخابات أراذل القوم.
• حسبو : نحنا فاتحين خط ساخن مع ربنا!!
• علي عثمان : أحمدو الله على الانقاذ زمان عود الكبريت كان معدوم.
• دبلوماسي بقنصلية السودان بجدة : الواحد قدام كفيله زي الفتاة يجي يتراجل هنا..!!
• كرار التهامي : الحكومة ما جمعية خيرية عشان تشغل المغتربين العائدين..!!
• بحر أبوقردة : مرضى السرطان بنتعب في علاجهم وبنخسر قروش وفي الآخر بموتو..!
• أبراهيم محمود : قبل الإنقاذ الناس كانت بتتقسم الصابونة..!!
• ربيع عبدالعاطي : دخل الفرد في السودان يساوي 1800 دولار في الشهر!! ..
• بدرالدين محمود : لو ما الانقاذ الشعب السوداني كان كلو مشى المقابر..!!
كسرة :
رأفة بك عزيزي القارئ و(عارفين الأدوية في البلد معدومة) فقد أسقطنا عمداً تلك المقولات التي من نوعية (الطيارة لما جات طافية النور الهناي ضرب البتاع) !
كسرات ثابتة :
• أخبار الخمسة مليون دولار التي قال البشير أنه سلمها لعبدالحي شنووو؟
• أخبار القصاص من منفذي مجزرة القيادة شنو (و)؟
• أخبار ملف هيثرو شنووووو؟ فليستعد اللصوص.
الجريدة